Dámosvos a benvida a este novo espazo de difusión do grupo local galego que é o noso blog.
Neste espazo aberto a todas publicaremos información relativa á nosa actividade como Sección Territorial da Galiza, até o momento o único grupo de traballo da cooperativa no noso territorio.
O grupo galego leva traballando e loitando por un modelo enerxético mais xusto e baseado en enerxías renovables desde o ano 2012, dando charlas, participando en feiras e compartindo, cara a cara, o proxecto da cooperativa. Podes ver un resumo da nosa actividade na plataforma de traballo.
Somos xa mais de 250 as persoas que nos fixemos socias da cooperativa e que dimos o salto para consumir doutro xeito mais consciente e acorde ao mundo que desexamos. Somos mais de 250, si, mais somos máis do que un número, somos unha comunidade, e por iso queremos, nesta nova etapa, mellorar a comunicación cos socios e socias da Galiza e facilitar a participación de todas na loita por un novo modelo enerxético. En breve poñeremos en marcha a páxina de Facebook do grupo, un perfil de Twitter,… e crearemos tamén un punto de información sobre a cooperativa na Coruña, un lugar onde persoas (socias ou non) poidan achegarse para coñecernos e resolver as súas dúbidas de xeito presencial.
Recomendámosvos que vos subscribades a este blog para recibir no voso correo notificacións das novas entradas e non perdervos todas estas novidades.
Lembrade que se queredes participar mais activamente na cooperativa podedes poñervos en contacto co grupo a través do noso enderezo: galiza@somenergia.coop
Saúde e boa enerxía!
Sección Territorial Som Energia Galiza